Siglir tar il cuntegn
cuntegn

Exteriur Emprima dunna en il cussegl da banca BCG

Per l'emprima giada è ina dunna commembra dal cussegl da banca da la Banca Chantunala Grischuna. La regenza haja elegì ella sco nova cussegliera, scriva il chantun Grischun il mardi en ina communicaziun a las medias.

Portrait.
Legenda: Ines Pöschel – ella succeda a Fabrizio Keller en il Cussegl da banca da la Banca Chantunala Grischuna. mad

La giurista Ines Pöschel è burgaisa da Winterthur e viva a Turitg. Ses champs da lavur centrals sajan il dretg dal martgà da chapital ed il dretg da societads cun focus sin dumondas da governance e da transacziuns d'interpresas, descriva la regenza en sia communicaziun a las medias.

La giurista saja vegnida elegida «pervia da sia experientscha cumprovada da blers onns en il dretg d'economia general sco er en il sectur da las bancas e dals servetschs finanziars» motivescha la regenza sia decisiun.

Iris Pöschel cumenza ses uffizi l'emprim d'avust 2018. Ella remplazza a Fabrizio Keller che ha demissiunà ils 31 da mars da cunquai ch'el aveva cuntanschì la limita dal temp d'uffizi.

RR novitads 20:00