Siglir tar il cuntegn
Inhalt

Exteriur Emprima dunna a la testa dal CIA

Per l'emprima giada è ina dunna a la testa dal servetsch secret american CIA. Ina maioritad dal senat ha confermà la candidata dispitaivla Gina Haspel che Trump aveva nominà.

Haspel tegn ad ault il maun ed engira. Fatscha seriusa.
Legenda: Gina Haspel durant la saramentaziun sco scheffa dal CIA. Keystone

Il senat ha approvà la nominaziun da Haspel cun 54 cunter 45 vuschs. Sis democrats han sustegnì la nominaziun. Dus republicans, da la vart da Trump han percunter vuschà cunter Haspel.

Involvida en metodas da tortura

Cunter questa nominaziun avevi dà grondas resalvas. Suenter las attatgas terroristicas dals 11 da settember 2001 era Haspel numnadamain stada involvida en in program, nua che suspectads da terror eran vegnids mess en praschuns secretas en l'exteriur ed interrogads cun modas da tortura. Organisaziuns da dretgs umans crititgeschan en quai connex l'elecziun da Haspel.

Da curt è Haspel, ch'ha 61 onns, sa distanziada da questas metodas avant il senat. Da lezzas uras hajan ella e ses collegas da lavur cartì quai ch'els faschevan. Els sajan suandads ad ordinaziuns da sura. Il program haja bain purtà bunas infurmaziuns e gidà ad impedir ulteriuras attatgas. Percunter haja il servetsch secret er emprendì ord las experientschas.

Lavurà pli che trais decennis sco agenta el zuppà

Haspel è stada activa pli che trais decennis sco agenta el zuppà ed ha lavurà sin plirs posts en l'exteriur. Dapi il 2017 è ella la substituta dal manader da la CIA. Trump aveva nominà ella sco successura da Mike Pompeo, ch'è entant minister da l'exteriur.

RR novitads 06:00