Siglir tar il cuntegn
cuntegn

Exteriur Emmanuel Macron perda ulteriurs ministers

Il president franzos perda ulteriurs dus ministers. Suenter la ministra da defensiun, Sylvie Goulard han ussa er il minister da giustia, François Bayrou e la ministra d'Europa, Marielle de Sarnez dà giu lur posts.

Purtret dad Emmanuel Macron che guarda serius.
Legenda: La furmaziun da la nova regenza è pli turbulenta che planisada. Keystone

Il minister da giustia franzos François Bayrou e la ministra da l'Europa Marielle de Sarnez demissiuneschan. Els na vulan betg far part a la nova regenza franzosa rapporta l'agentura da novitads AFP. La partida da Bayrou e de Sarnez, «MoDem» vegn il mument scurlattada d'in'affera davart pseudo-occupaziun. Mardi è gia sa retratga la ministra da defensiun Sylvie Goulard. La giustia examinescha renfatschas che collavuraturs da la partida sajan vegnids pajads da represchentants da l'UE, senza avair lavurà per els.

Nova regenza cun turbulenzas

Sco usità en Frantscha ha Emmanuel Macron cumenzà a furmar la nova regenza. Il primminister, Edouard Philippe ha demissiunà il glindesdì e survegnì l'incumbensa da furmar la nova regenza. Ussa hai dentant dà intginas turbulenzas durant furmar la nova regenza.

Dasper Goulard, Bayrou e Sarnez croda era il minister per la coesiun territoriala, Richard Ferrand or da la regenza. El duai daventar schef da fracziun da la partida dal president, La République en Marche.

RR novitads 11:00