Siglir tar il cuntegn

Header

cuntegn

Elecziuns USA 2020 Duas vuschs van a Biden ed ina vusch a Trump

Anita Turner (62) da Texas, Maria Luisa Ardini-Fontana (89) da California e Claudius Vincenz (60) da Michigan èn trais Rumantschs che vivan dapi decennis en l'America. Ed els han in patratgar zunt different davart la politica americana.

Anita Turner (Texas)

  • 62 onns
  • oriunda da Trun
  • dapi il 1983 en ils Stadis Unids

La dunna ch'è oriunda da Trun abita dapi 37 onns en ils Stadis Unids. Ella è maridada cun in Texan ed abitescha ad Austin, la chapitala dal Texas. Avant quatter onns ha Anita Turner dastgà vuschar per l'emprima giada ed ella ha dà la vusch a Donald Trump. Er quest onn na datti nagina discussiun a tgi che sia vusch va.

Jau dun puspè mia vusch a Donald Trump
Autur: Anita Turner
audio
Elecziuns USA 2020: Anita Turner sustegna Donald Trump
ord Actualitad dals 27.10.2020.
laschar ir. Durada: 3 minutas 36 Secundas.

Anita Turner n'è betg in fan dal president american. Tenor la dunna da 62 onns saja Trump dentant in president che guardia per il bainstar dal pajais. La Sursilvana menziuna ch'els pajan pli pauca taglia dapi ch'il republican è a la testa dals Stadis Unids. Plinavant haja ella bler dapli fidanza en Trump ed ils conservativs quai che pertutgia l'economia. Cun il candidat democrat na sa ella cumenzar nagut. «El faschess meglier dad ir plaunsieu en pensiun».

Maria Luisa Ardini-Fontana (California)

  • 89 onns
  • oriunda da Cumbel
  • dapi il 1962 en ils Stadis Unids

La Lumneziana abita dapi var 50 onns en l'America. Quai a Pleasant Hill, datiers da San Francisco, ina regiun ch'è cleramain democratica. Uschia va sia vusch er a Joe Biden. Per la dunna dad 89 onns n'è quai nagina dumonda. Gia avant quatter onns ha ella dà sia vusch a la candidata democratica, Hillary Clinton. Sch'ella discurra da Donald Trump vegn ella tut vilada.

El n'è betg perdert, el sa pauc e di manzegnas mintga di.
Autur: Maria Luisa Ardini-Fontana
audio
Elecziuns USA 2020: Maria Luisa Ardini-Fontana sustegna Joe Biden
ord Actualitad dals 27.10.2020.
laschar ir. Durada: 3 minutas 15 Secundas.

Quai che vilenta spezialmain Maria Luisa Ardini-Fontana vid il president en uffizi, è il fatg ch'el haja insumma nagina empatia per concarstgauns. Quai sa mussia uss durant la crisa da corona u er durant ils incendis a California ils ultims mais.

Joe Biden saja gist il cuntrari, ina persuna cun respect e manieras. El fissi bain in vegl president, dentant segir in bler meglier che Trump.

Claudius Vincenz (Michigan)

  • 60 onns
  • oriund d'Andiast
  • dapi il 1984 en ils Stadis Unids

Ann Arbor è il dachasa da l'um ch'è dapi var 35 onns en ils Stadis Unids. En la citad da students lavura el a l'universitad sco biochemicher. La citad saja fitg liberala e perquai èsi per el cler: «Jau dun la vusch a Biden».

Per Claudius Vincenz èn ils Stadis Unids sa midads ils ultims quatter onns. Il pajais era gia avant dividì, questa forsch saja entras Trump dentant vegnida anc pli gronda. Il pensar en las citads a Michigan sco Detroit u Ann Arbor saja in tut auter che or en champagna. Saja quai pertutgant il coronavirus, il rassissem u er la midada dal clima.

Il pajais dovra ina perioda da vegnir ensemen. Perquai fiss Biden il dretg president.
Autur: Claudius Vincenz
audio
Elecziuns USA 2020: Claudius Vincenz sustegna Joe Biden
ord Actualitad dals 27.10.2020.
laschar ir. Durada: 3 minutas 42 Secundas.

Davart Donald Trump na po Claudius Vincenz betg discurrer positiv. Sia lavur ils ultims quatter onns descriva el perfin sco «catastrofala». El mettia nagina paisa sin la democrazia. Perquai spera l'um d'Andiast ch'il temp da Donald Trump en Chas'Alva va a fin.

Grafica davart trais Rumantschs en ils Stadis Unids cun lieu da domicil
Legenda: Trais Rumantschs en ils Stadis Unids RTR

RTR actualitad 07:00

Artitgels legids il pli savens