Siglir tar il cuntegn

Elecziuns USA 2016 USA: Clinton fa squitsch sin Trump

La candidata democrata ha publitgà sias decleranzas da taglia dals ultims onns. Il republican Donald Trump refusescha però da far il medem.

Politicra americana.
Legenda: Clinto sforza probabel Trump da medemamain publitgar sia decleranza da taglia. Reuters

Hillary Clinton e ses candidat per il vicepresidi, Tim Kaine, han publitgà lur decleranzas da taglia dapi il 2006. Ensemen cun ses um Bill ha Hillary Clinton gudagnà il 2015 tut en tut 10,6 milliuns francs – la gronda part cun onuraris per pleds e preschentaziuns.

Uschia crescha il squitsch sin ses contrahent republican per il presidi dals Stadis Unids. Donald Trump refusescha numnadamain da far il medem. En ils Stadis Unids n’èsi betg obligatoric per ils candidats da publitgar lur decleranzas da taglia. Dentant han tut ils candidats republicans fatg quai dapi ils onns 1980. La «New York Times» smina che la chargia fiscala per il milliardari Trump pudess muntar a 0.

Avant pauc temp aveva gial l'investider Warren Buffet pretendì da Donald Trump da publitgar sia decleranza da taglia. Buffet fiss pront da far il medem e da discutar davart quella publicamain.

Clinton cun avantatgs en «Swing States»

La candidata democratica per il presidi american - Hillary Clinton - ha gudagnà vuschs en stadis federativs impurtants. Tenor ina retschertga da l'emettur da televisiun american NBC maina Clinton a moda clera en ils uschenumnads «Swing States» Virginia, Colorado, Florida e North Carolina.

RR novitads 23:00/06:00 ++

«Swing States»

Quai è stadis federativs da l'America, nua che votantas e votants na vuschan betg mintga giada per la medema partida, mabain midan d'elecziun tar elecziun per il candidat republican u democrat.
Uschia èsi impurtant per mintga candidat da gudagnar quest potenzial.