Siglir tar il cuntegn
cuntegn

Elecziuns USA 2016 Trump preschenta intginas decisiuns da persunal

Il futur president american Donald Trump è sa decidì per il parsura da la partida republicana, Reince Priebus sco nov schef dal stab en la Chasa alva. Era en discussiun era il schef dal cumbat electoral da Trump Stephen Bannon. Ma quel daventa ussa schefstrateg e cussegliader da Trump.

Purtret da Trump e Priebus.
Legenda: Reince Priebus e Trump durant il pled suenter la victoria da las elecziuns. Keystone

Donald Trump argumentescha decisiun uschia ch'el haja cun agid da Priebus e Bannon dumagnà da gudagnar las elecziuns dal presidi. Priebus e Bannon sajan fitg qualifitgads ed hajan gia durant la campagna electorala lavurà ensemen bain.

Uss vegn jau ad avair els dus cun mai en Chasa alva cura che nus lavurain ensemen per puspè far grond ils Stadis Unids.
Autur: Donald TrumpFutur president dals Stadis Unids

Priebus haja menziunà las prioritads dal nov president: In'economia che portia insatge, segirar ils cunfins, dismetter e remplazzar Obamacare e destruir l'islamissem radical ed il terrorissem. Il pensum da Priebus è lura da coordinar l'administraziun dal president. El saja in politicher cun blera experientscha.

Bannon perencunter deriva dad autras ragischs. Il schef d'ina pagina d'internet conservativa, «Breitbart» ha Trump engaschà l'avust per sia campagna electorala. L'expert dad IT era er en discussiun per daventar schef dal stab. Tranter conservativs en ils Stadis Unids vala el sco figura provocanta.

Las medias americanas avevan ditg avant la decisiun da Trump che cun questa nominaziun sa mussia quai sche Trump veglia in curs moderà ni la confruntaziun. Il schef da stab è la segunda impurtanta persuna en la Chasa Alva. El maina il stab da collavuraturs ed ha in access direct al president.

RR novitads 06:00