Siglir tar il cuntegn
cuntegn

Elecziuns USA 2016 Trump gudogna – tge din ils Rumantschs?

Donald Trump ha gudagnà il cumbat electoral per il presidi dals Stadis Unids da l'America. Ina surpraisa? In cletg? Ina catastrofa? Las reacziuns da Rumantschas e Rumantschs en l'USA. Tranter auter cun Video Chat.

Teaser.
Legenda: RTR

Il nord ed il sid dividids

Jeannette Pringle (abita a Niantic, Connecticut) e Flavia Acosta Fox (Fort Lauderdale, Florida) discussiuneschan cun Ursin Cadisch davart l'elecziun da Donald Trump.

Per Flavia Acosta pudess la divisun dals Stadis betg Unids sa mussar uss tant pli fitg. I va per las divisiuns tranter alv e nair, ritg e pover, immigrants e na-immigrants.

In schoc per Mirco Raguth Tscharner

Mirco Raguth Tscharner, oriund da Schiers, raquinta, che la glieud n'haja fin la fin betg propi cret che Donald Trump vegnia president. Ses facit persunal:

Igl è in schoc … pertge a questa moda ha l’America ussa litteralmain ditg … ch’ella stat davos in president che stat per in’America dal 1950, e betg dal 2016.

Trump? La catastrofa per Claudius Vincenz

Michigan nua che Claudius Vincenz viva è in Swing State, in stadi tut tenor decisiv per l'elecziun da Donald Trump u Hillary Clinton. Michigan è pia in dals stadis federativs da l'USA ch'è stà en il focus dal interess mundial.

«Interessant n'è betg il pled che giascha sin mia lieunga» di Claudius. Per el fiss l'elecziun da Donald Trump ina catastrofa, ha el detg anc avant ch'il resultat è stà enconuschent.

Claudius Vincenz è oriund d'Andiast en Surselva.

Clinton? Never!

Anita Turner stat a Texas, in stadi federativ ch'elegia tradiziunalmain republican. Ella ha votà per Donald Trump, dentant senza grond entusiassem.

«Jau hai stuì tegnair in zichel in nas avant da votar per Trump» di Anita Turner. «Mo pli gugent Donald Trump che Hillary Clinton». Ella na quinta dentant betg che Trump haja tanta pussanza da realisar tut quai che la glieud pensa ch'el vegnia a far.

Anita Turner è oriunda da Trun.

"Senza pleds"

A John Emmanuel Gartmann mancan ils pleds suenter l'elecziun da Donald Trump sco president american. "99.9% er jau segir che Hillary Clinton vegnia elegida", dil il sursilvan che stat a New York. Tge che spetga ils Stadis Unids cun il nov president na sa el betg - quai na sappia nagin.

John Emmanuel Gartmann è oriund da Castrisch.

Sch'insatgi dumogna ussa quella crisa, lura èsi l'America.

In di sco tut ils auters

Martina Werro è da preschent sco turista en l'USA. A San Francisco na sentivan ins sco turista quasi nagut da l'elecziun al di da lezza. Ina pintga differenza dettia quai però: Il di da l'elecziun era da vesair persunas per las vias cun in pitschen tatgader cotschen vid la vestgadira cun scrit si: «I voted» («Jau hai elegì»). Quai tatgader saja il 'hit'.

La California vuscha tradiziunalmain democratic.

Resumaziun

Tgi è schocà, tgi è optimistic e tgi è ventiraivel. Las Rumantschas e Rumantschs che stattan en ils pli differents lieus en il Stadis Unids reageschan different sin l'elecziun dal nov president Donald Trump.

Ina resumaziun da las intervistas.

Ed ils americans en Svizra … ?

Tenor James Joley dals republicans en Svizra fa Donald Trump las dretgas dumondas, sco: Ston ils Stadis Unids adina far da polizist per l'entir mund?

Renée Rousseu dals democrats en Svizra tema perencunter per il sistem da sanadad che Obama ha instradà.

A la Election Night da l'ambassada da l'USA a Berna ha regì l'entschatta la tensiun, mo lura è quella sa midada en resignaziun.

Sin Twitter pudais tschivlottar cun nus, il link avra en ina nova fanestra – #ELECUSA

RR actualitad 05:00 +