Siglir tar il cuntegn
cuntegn

Elecziuns USA 2016 In’emna suenter – mirar enavant u vinavant consternà?

Avant in’emna il grond plum e la gronda surpraisa – Donald Trump vegn elegì sco nov president dals Stadis Unids. Co è l’atmosfera in’emna suenter l’elecziun? Nus avain dumandà trais Rumantschs ch'abiteschan en ils Stadis Unids.

In’emna suenter il grond plum è l’atmosfera en ils Stadis Unids da l’America fitg differenta. «Jau sun anc adina deprimi», di per exempel Claudius Vincenz, che stat en il stadi da Michigan en il Midwest da l’America. L'um da 58 onns abitescha en il martgà da students Ann Arbor, in martgà fitg liberal. Sch’ins discurra cun ils convischins tuts che dian ch’els hajan tema.

Jau na ma sent betg meglier in'emna suenter l'elecziun.
Autur: Claudius Vincenzabitescha a Ann Arbor (Michigan)
En l'entira America datti demonstraziuns encunter Donald Trump.
Legenda: En l'entira America datti demonstraziuns encunter Donald Trump. Keystone

In zic pli optimistic tunì en il vest dals Stadis Unids, en California. Maria-Luisa Ardini-Fontana ha 85 onns ed abitescha datiers da San Francisco. L’atmosfera saja sa midada ils davos dis. Ils emprims dis erian tuts vilads, uss dian blers: «let’s give him a chance».

Ils davos dis è Donald Trump saja sa mussà d'ina meglierà vart, betg sco en il cumbat electoral. Quai dettia curaschi per il futur.

Trump sa mussa pli diplomatics – quai na plascha betg a tuts

En il stadi da Florida agiteschia quai sa depurtar da Trump tscherts fans, declera Flavia Acosta Fox. El prendi enavos empermischuns, quai na plaschia betg a tuts.

Tuttina dettia era a Florida bler glieud che demonstreschia encunter il nov president. Il nivel da quellas demonstraziuns saja per part però trist. «Demonstrar agressiv e rassistic è la fallida via». Lura sajan ins numnadamain exact sin il medem nivel sco Trump, uschia Acosta Fox.

Consternaziun, malsegirtad, ma è optimissem. Tuts miran in zic different en il futur. Per ils trais Rumantschs èsi dentant cler che la tensiun en ils Stadis Unids vegn era il proxim temps a restar auta.

RR actualitad 07:00