En tge direcziuns ch'ils Stadis Unids van cun Trump a la testa na sappia nagin, uschia scrivan pliras gasettas. «Forsa era l'um mo uschè sturn, fin ch'el era president. Ed uss, cura ch'el è president, pon ins discurrer cun el, scriva per exempel «Der Bund».
La NZZ renviescha sin ils «checks e balances». Per la gasetta da Turitg è il pli grond privel la politica exteriura nua ch'il president po agir per gronda part autonom. «Nagin retegna el per exempel da desdir l'empermischun da defensiun envers la NATO u da sa colliar pli fitg cun la Russia e ses president Wladimir Putin.»
«Il giudizi da Trump è pli ferm che quai che blers patratgan», scriva la Weltwoche. Trump na saja nagin pensader, dentant malizius. E vitiers saja el gia adina stà in pragmaticher. El veglia puspè far gronds ils Stadis Unids. «Sco um da fatschenta sa el ch'ins na cuntanscha quai betg cun guerras. Lain guardar.» uschia la Weltwoche.
Trump saja bain «sco president in nausch siemi dals sentiments» scriva il Tages-Anzeiger. Sut el pudessi dentant er vegnir meglier per il mund. Ils Stadis Unids hajan «cuntanschì cun smanatschar che la Svizra haja abolì il secret da bancas», cun Trump pudessi strusch vegnir anc mender.