Suenter l’emprim schoc sur da la victoria da Donald Trump sco nov president èn ils martgads da finanzas puspè sa calmads. En Svizra è l’index SMI curt avant 11.00 uras tar in plus da 1,17%.
D’engraziar è quai plus dal augment da las acziuns da Novartis (+3,5%) e Roche (+4%). Ils dus concerns mundials han ina gronda influenza sin l’index SMI. Ina president Clinton avess probabel introducì controllas pli severas per la branscha da farma e medicaments. Abstrahà da quai èn pliras aczias da impurtants concerns sco Swatch (-1,8%) ni era da bancas il mument en il minus.
Era il DAX en Germania sa revegn dal emprim schoc
En la Germania ha quai dà in sumegliant svilup cun il curs dal index DAX. La damaun ha l’index pers per part sur 2%, il mument curt avant las 11.00 uras è el sa revegnì sin in -0,41%.
En l’Asia perdan bursas massiv
A Hongkong, Shanghai e Seoul è la bursa crudada per quasi 3%, a Tokio per 5,4%. Ed era ferm tutgà ha quai il peso mexican. Quel ha reagì zunt sensibel, damai che Trump vul introducir dazis da multa sin rauba mexicana e bajegiar in mir al cunfin cun il Mexico. La valur dal Peso è crudada envers il dollar american per 13%.
Il pretsch per l'aur perencunter ha gudagnà per 2,33%.
RR novitads 07:00