En ils stadis federativs Wisconsin, Michigan e Pennsylvania varieschian ils resultats frappant. Quai rapporta il 'New York Magazine' e sa referischa sin ina gruppa d'activists. I dettia in muster d'indizis che demussian, ch'ils resultats sajan vegnids manipulads a maun u electronicamain. Mussaments n'hajan ins dentant anc betg. Ils experts ed advocats vulan persvader Hillary Clinton da pretender ina nova dumbraziun.
En tut ils 3 stadis surmenziunads ha il futur president american Donald Trump gudagnà be cun paucas vuschs differenza, ed uschia surpassà il dumber necessari da 270 vuschs electoralas. Hillary Clinton ha la finala cuntanschì 232 vuschs electoralas, e Donald Trump 290.
RTR novitads 16.00