«Yes we can». Cun quest slogan ha Barack Obama conquistà ils cors dals Stadis Unids e da persunas sin l’entir mund. 250’000 persunas avevan festivà el avant 8 onns a Chicago suenter sia elecziun sco nov president. 8 onns pli tard dastga Obama mirar enavos sin in temp turbulent – sin success e terradas.
Politicamain cun success e terradas...
Barack Obama ha sanà l’economia americana, suenter la crisa en l’onn 2008. Oz è il dumber da dischoccupaziun tar gnanc 5%. A l’entschatta d’uffizi era quella anc tar bun 8%.
Tema durant ils 8 onns d’uffizi è adina puspè il rassissem stà. Obama leva adina ina terra, nua che tuts vivan en pasch ensemen. Democrats e republicans, persunas da pel stgira e persunas da pel clara. Quai n’è dentant betg gartegià. Il dumber d’attatgas rassisticas è creschì ils davos onns.
Dapli davart success e terradas da Barack Obama pudais tadlar en quest document d’audio.
...unic sco persuna
Barack Obama va en l' istorgia sco president american cun stil. I vegn perfin detg, che Obama ha influenzà ses temp d’uffizi cun ses stil e sia persunalitad uschè fitg sco John F. Kennedy els onns 60.
Ses stil, sia eleganza e levezza èn ils motivs, daco che Obama vegn ad ir ella istorgia sco president fitg popular.
RR actualitad 12:00