Siglir tar il cuntegn
cuntegn

Exteriur Elecziuns Tschechia – populist Babis cun clera victoria

Tar las elecziuns en Tschechia vegni tenor emprims resultats tar in spustament a dretg. Il grond victur è il multi milliardari Andrej Babis.

Purtret Anrej Babis
Legenda: Andrej Babis vegn a daventar il nov schef da la regenza tscheca. Keystone

Il moviment populistic da protesta ANO («Gea») dal multi milliardari Andrej Babis è sin plazza 1, suenter ch'ils locals d'elecziun èn serrads. Il moviment ANO ha fatg 30,4% da las vuschs. Quai annunzia l'autoritad da statistica a Prag suenter che 90% dals circuls d'elecziun èn dumbrads ora. Sin plaz 2 seguan en Tschechia ils extrems da la dretga SPD.

Tenor l'uffizi da statistica a Prag han da quai da 60 pertschient fatg part a las elecziuns.

Babis crititgescha l’Uniun europeica e la politica da fugitivs

Il politicher Andrej Babis è sa profilà durant il cumbat electoral sco scepticher da l’UE e criticher da la politica da fugitivs dad Angela Merkel.

L’um da 63 onns è fundatur d’in grond imperi da fatschentas che cumpiglia gasettas quotidianas ed emetturs da radio privats. Critichers cumpareglian Babis cun il president american Donald Trump ni cun Silvio Berlusconi.

Cumbatter la migraziun a moda resoluta

Il victur da las elecziuns parlamentaras en Tschechia Andrej Babis vul cumbatter la migraziun a moda resoluta. En il nov elegì chancelier austriac Sebastian Kurz haja el chattà in allià. Els hajan numnadamain la medema tenuta areguard l’immigraziun. Quai ha Babis ditg a l’agentura da novitads Reuters. Dasper la Pologna, la Slovachia e l’Ungaria dovria la Tschechia anc dapli alliads en il cumbat cunter la migraziun – uschia Babis. Quai era per avair dapli pais en l’Uniun europeica.

Debachel per ils socialdemocrats

Ils socialdemocrats (CSSD), ch’avevan enfin uss tschentà il schef da la regenza, han fatg in mal resultat. Tenor cifras intermediaras vegnan els sin 7,5% da las vuschs. L’onn 2013 eran quai anc 20,5%.

RR novitads 18:00