Siglir tar il cuntegn

Header

cuntegn

Exteriur Elecziuns presidialas en l'Austria: FPÖ gudogna l'emprima runda

Ina victoria spectaculara per ils populists da la dretga da la FPÖ: Tar l’elecziun dal president da l’Austria ha Norbert Hofer gudagnà l’emprima runda. Ils candidats da la SPÖ ed ÖVP na cuntanschan betg l’elecziun decisiva.

Ils populists da la dretga da la FPÖ han cuntanschì ina victoria spectaculara tar l'emprima runda da l’elecziun dal president da l’Austria. Il candidat da la FPÖ Norbert Hofer vegn tenor calculaziuns da l'insitut da retschertga Sora sin 36,4 pertschient da las vuschs. Uschia è el sa distanzià cleramain dals auters tschintg candidats.

Fin uss è quai il meglier resultat da la FPÖ sin plaun federativ. Perquai che Hofer (45) ha manchentà la marca da 50%, datti però in’elecziun decisiva tranter Hofer ed il candidat cun il segund meglier resultat.

Elecziun decisiva cunter ils Verds

L'anteriur schef dals Verds Alexander van der Bellen (72) ha fatg cun 20,4% da las vuschs il segund meglier resultat e frunta uschia sin Norbert Hofer en l'elecziun decisiva ils 22 da matg 2016.

Sin il terz plaz suonda la candidata senza partida Irmgard Griss cun 18,5% da las vuschs. Uschia manchenta ella la segunda runda. In debachel daventa l’elecziun per ils aspirants da la regenza cotschen-naira. Rudolf Hundstorfer (SPÖ) ed Andreas Khol (ÖVP) survegnan mintgamai 11,2% da las vuschs. Sin il davos plaz è l’impressari Richard Lugner cun 2,4%.

Naginas consequenzas persunalas

La coaliziun politica nair-cotschna en l’Austria na vul betg instradar midadas persunalas suenter las elecziuns presidialas. Il chancelier da l’Austria Werner Faymann (SPÖ) vesa sasez vinavant en ina ferma posiziun. El stettia bain en sella, ha ditg Faymann. Er il vicechancelier e parsura da la ÖVP Reinhold Mitterlehner na vesa nagin basegn per debattas da persuna.

RR novitads 18:00

Artitgels legids il pli savens