Siglir tar il cuntegn

Header

Navigaziun

Il primminister actual Mark Rutte votescha.
Legenda: La partida dretg-liberala dal primminister actual Mark Rutte resta tenor las ultimas prognosas la pli ferma. Keystone
cuntegn

Exteriur Elecziuns Pajais Bass: Victoria per Rutte - terrada per Wilders

Tenor las ultimas prognosas cuntanscha la partida dal primminister actual Mark Rutte 33 dals 150 sezs, quella dal populist dretg Geert Wilders be 20. La partida da Geert Wilders ha uschia gudagnà tschintg sezs, quella da Mark Rutte pers otg cumpareglià cun las ultimas elecziuns il 2012.

  • La partida VVD dal primminister Mark Rutte gudogna las elecziuns parlamentaras.
  • Suenter che 95% da las vuschs èn dumbradas, na po ses avantatg betg pli vegnir prendì suenter.
  • Rutte dastga quintar cun 33 dals 150 sezs. Segund ferma partida è quella dal populist da dretga Geert Wilders cun 20 sezs.
  • La participaziun a las elecziuns è stada fitg auta cun actualmain bun 80%. 13 milliuns Ollandais èn stads clamads a l'urna.

La partida da la lavur PvdA da Lodewijk Asscher che furma actualmain la regenza ensemen cun la partida VVD dal dretgliberal Mark Rutte perda probablamain uschè blers sezs sco anc mai. Ella cuntanscha be 9 sezs, il 2012 tar las davosas elecziuns aveva ella anc cuntanschì 38. Uschia na po Mark Rutte betg cuntinuar cun la coaliziun gronda cun ils socialdemocrats (PvdA).

Er la partida liberala da la sanestra (D66) ed ils cristiandemocrats (CDA) cuntantschan in bun resultat. Ellas èn cun mintgamai 19 sezs datiers da la partida dal populist da la dretga Geert Wilders.

Grond success per ils verds sanesters

La partida verd sanestra cun ses top-candidat Jesse Klaver ha tenor las ultimas prognosas gudagnà diesch sezs cumpareglià cun il 2012. Plirs commentaders a la televisiun dal dretg public dals Pajais Bass argumenteschan quest success d'ina vart cun blers giuvens che hajan votà per ils verds sanesters. Da l'autra vart er generalmain cun l'auta participaziun a las votaziuns ch'è tar passa 80%.

I vegn spetgà grevas contractivas per furmar la regenza

Per formar la regenza dovri 76 dals 150 sezs. Cun la situaziun actuala duvrassi quatter fin tschintg partidas per cuntanscher questa maioritad. Vegn vitiers che las partidas sanestras na vulan betg exnum furmar ina regenza cun partidas dretgas ed il cuntrari. Uschia spetgan ins lungas contractivas da coaliziun.

Reacziuns internaziunalas

Intginas medias valiteschan il resultat da las elecziuns parlamentaras en ils Pajais Bass sco terrada per populists da dretga, er en auters pajais. «Tagesanzeiger.ch» manegia che la malsegirezza en connex cun il Brexit e l'elecziun da Donald Trump na mainian betg a moda directa ad in «Nexit».

La maioritad dals Ollandais na vul ni sortir da l'UE ni in Trump ollandais.
Autur: Tagesanzeiger.ch

Tenor «Faz.net» ha il primminister Rutte profità il pli fitg da l'escalaziun cun la Tirchia. I saja dentant tuttina difficil da furmar ina nova regenza.

Ed er «Spiegel Online» dat en la medema crenna: il resultat da Den Haag saja in cuntraculp per Le Pen. I na dettia nagin effect da domino en l'Europa - quai hajan gia las elecziuns en l'Austria mussà. Le Pen haja dentant tuttina schanzas realas da daventar presidenta da la Frantscha. Ses Front National saja bler pli entretschà en la societad che la partida d'in um selvadi en l'Ollanda.

RR novitads 22:00+