Ins senta ch'i muventa la dunna en ils 60 cura ch'ella raquinta da sias ragischs en Germania. Tuttina è ella da l'avis che quai stoppia vegnir ditg. Igl è numnadamain propi il motiv daco che Katja Spescha ha bandunà la Germania: Ses geniturs eran anc naziunalsocialists or da persvasiun. Ses bab ha er anc fatg servetsch en l'armada. Quai ensemen cun la depressiun che regiva da lez temp en la Germania ha dà a Katja Spescha il stausch da bandunar la patria avant 34 onns.
Chattà il cletg en Svizra
Ella saja vegnida qua e saja sa sentida fitg spert fitg bain:
Jau hai propi tschitschà si qua in mund lev, in mund neutral. Entras quai sun jau vegnida sauna.
Entaifer be trais onns ha ella maridà e cunquai er survegnì il dretg da votar ed eleger. En Germania ha ella sco oriunda dal vest da Berlin mai elegì insatge auter ch'il senat, il parlament da la citad. Perquai era ella il cumenzament surdumandada cun il dretg da votar ed eleger en Svizra. Uss tutgia quai però tiers ed ella vesa quai sco gronda schanza e libertad.
Berlin na dovra ella betg propi pli
Katja Spescha va adina puspè gugent a far ina visita en sia patria, saja quai tar parents u er simplamain per sentir, savurar ed udir la metropola, ella saja però fitg spert puspè tancada plain.
Jau vegn anc adina fitg gugent a chasa. Cunzunt sche jau vegn en ils culms e vom en direcziun dachasa, givlel jau bunamain dal plaschair.
Sias ragischs e sia istorgia na sa e na vul la mamma da quatter uffants betg snegar. Perquai ha ella era dà cun quai a ses uffants. Ed i legra ella che sia feglia Celina ha chattà ses cletg en l'emprima patria da la mamma a Berlin. Celina viva e lavura là dapi trais onns e mez. Forsa possia sia feglia viver là quai ch'ella n'haja pervi da sia istorgia betg pudì far, uschia Katja Spescha.
RR actualitad