Siglir tar il cuntegn

Header

cuntegn

Elecziuns Germania 2017 Coaliziun gronda – a Berlin hai funcziunà, a Würselen betg

A Würselen, la patria da Martin Schulz ha la coaliziun gronda tranter SPD e CDU gia fatg naufragi la primavaira. Visà il contract da coaliziun ha la CDU ch'è a Würselen cuntrari al parlament naziunal la pitschna da las duas partidas.

audio
Mezdi: Elecziuns en Germania – Würselen coaliziun gronda ha fatg naufragi
ord Actualitad dals 25.09.2017.
laschar ir. Durada: 2 minutas 40 Secundas.

Quai ch'è da dir a l'entschatta: Ils exponents da la CDU da Würselen n'han betg vulì prender posiziun envers RTR. Dad els resta sulet la brev nua ch'els han communitgà ed argumentà la visada da la coaliziun.

Auter la SPD: Tenor il parsura da la SPD da Würselen Andreas Dumke è il crap da stgarpitsch per la coaliziun gronda stà in parc da sport. Bain han omaduas partidas vulì quel, la SPD ha dentant anc pretendì ina votaziun dal pievel perquai ch'i ha dà resistenza. Quella votaziun n'ha la CDU betg vulì ed ha visà la coaliziun.

Communicaziun n'ha betg plaschì a la CDU

En la brev da visada scriva il parsura da la CDU Würselen: La SPD haja decidì ensemen cun il president communal da far quella votaziun senza infurmar la CDU sco partenari da coaliziun. Quai na saja betg vardaivel. Sin quai di Andreas Dumke da la SPD be:

Bun, insatge ston ins gea scriver sch'ins visescha in contract senza raschun...
Autur: Andreas Dumke parsura da la SPD Würselen

Andreas Dumke n'ha lura er nagina chapientscha per la decisiun da la CDU. Cun maioritads che sa midian trasor saja la regenza da la citad bler pli pauc stabila.

Plitost il cas excepziunal

Ch'ina partida visescha il contract da coaliziun forsa pli tgunsch sin livel communal che naziunal na crai Adreas Dumke betg. Pertge tenor el èn las partidas communalas, malgrà tschertas differenzas d'opiniuns, bler pli savens dal medem avis che sin livel naziunal. Tuts sajan numnadamain interessads da prender decisiuns per il bun e per il svilup da la citad.

El saja bain trumpà, ma uschè mal n'haja il naufragi da la coaliziun gronda en la regenza da la citad Würselen er betg fatg, manegia Andreas Dumke da la SPD. I saja numnadamain sa mussà che las differenzas tranter la SPD e la CDU sajan pli grondas che quai ch'ins haja pensà al cumenzament.

RR actualitad 12:00

Artitgels legids il pli savens