Dumengia è l'emprim scrutini per las elecziuns dal parlament Franzos. In'emna pli tard è lura il segund scrutini. Las meglras schanzas ha tenor las pli novas retschertgas il moviment dal president Emmanuel Macron «La République en Marche».
Il moviment dastga quintar cun 30% da las vuschs d'electurs. Uschia daventass el la pli ferma forza en l'assamblea naziunala. Grazia al sistem da maiorz en ils 570 circuls electorals pudessi schizunt esser, ch'il moviment cuntanschess il pli absolut en il parlament.
Candidats «sincers» han avantatg
Electurs han ditg en las retschertgas, che la sinceradad dal candidat è il pli grond motiv per eleger el. «La République en Marche» profitescha cunzunt dal giavisch dals electurs da trametter novs chaus en il parlament. Pli che la mesadad dals candidats da Marcon èn fin uss numnadamain betg stads activs politicamain.
Blers electurs en Frantscha vulan precis quai. Els na vulan betg pli eleger ils vegls politichers, ch'èn per part gia dapi 20, 25 u 30 onns en il parlament.
Sin donn e cust da partidas etablidas
En emprima lingia ston las partidas etablidas quintar cun pli paucs electurs. La partida socialista da l'anteriur president François Hollande survegn tenor retschertgas mo pli 9% da las vuschs. In zic meglier guarda quai or tar «Les Républicains». Qua quintan las retschertgas en l'emprim scrutini cun radund 20% da las vuschs.
«Front National» vul daventar la pli ferma opposiziun
Marine Le Pen, ch'era ida en il cumbat per la partida dretg extrema, ha annunzià ch'il «Front National» duai daventar la pli ferma opposiziun en Frantscha. Dentant tenor Charles Liebherr, il correspundent dad SRF en Frantscha, ha la partida fatg ina flaivla parita las davosas emnas. Ins haja il sentiment, che Marine Le Pen n'ha betg magunà la terrada. Tenor las retschertgas po il «Front National» quintar cun radund 17% da las vuschs, uschia che las schanzas da daventar la pli ferma opposiziun èn tenor Liebherr pitschnas.
RR actualitad 07:00