Macron (1977) è il candidat liber cun posiziuns sozial- ed economic liberalas. El vala actualmain sco favurit per il post sco president.
Le Pen (1968) è la candidata da la partida dretga Front National da la quala ella è scheffa. Ensemen cun Macron vala ella sco favurita.
Radund quatter uras han tut ils 11 candidats uffizials debattà e discutà. Tranter auter è era l'UE stada tema. Cunzunt Emmanuel Macron e Marine Le Pen, quels dus che mainan per il mument las retschertgas, han gì vehements cumbats. Macron suttametta schizunt a Le Pen da dir manzegnas.
Disput tranter Le Pen e Macron
«Naziunalissem è guerra. Jau sai quai. Jau vegn d'ina regiun ch'è plaina cun fossas da la guerra», uschia Macron che vegn da la regiun Somme nua ch'in dals pli sanguinus cumbats da l'Emprima guerra mundiala è stà. Le Pen ha dà encunter «Vus na duessas betg pretender che Vus sajas insatge nov, sche vus discurris sco veglias fossilias ch'èn almain 50 veglias». Macron ha puspè da encunter: «Jau stun mal, Madame Le Pen, ma Vus schais las medemas manzegnas co nus avain udì 40 onns da Voss bab». Il bab da Marine Le Pen è Jean-Marie Le Pen, fundatur da la partida dretga Front National, da la quala Marine Le Pen è uss scheffa.
Mélenchon ha persvas
Curt suenter la debatta ha Elabe, in institut da demoscopia, fatg ina retschertga tar ils franzos. Tenor quel èn 25% da l'avis ch'il socialist Jean-Luc Mélenchon ha persvas il pli fitg. Emmanuel Macron è sin plaz dus cun 21%. François Fillon sin trais e Marine Le Pen cun be 11% sin plaz quatter. Preschentà il meglier ses program politic ha tenor la retschertga Emmanuel Macron.
RR actualitad 06:00