Siglir tar il cuntegn
cuntegn

Exteriur Elecziuns en Siria - amez la guerra

En Siria lascha il reschim da Baschar al-Assad eleger oz in nov parlament e quai malgrà ch'i dat adina puspè cumbats en tschertas parts dal pajais. L'opposiziun ed ils stadis dal vest crititgeschan quest agir.

Il maletg mussa co Baschar al-Assad metta il cedel da votar en l'urna.
Legenda: Il regent sirian Baschar al-Assad lascha eleger oz il parlament - malgrà la guerra civila en Siria. Keystone

Suenter quatter onns saja la legislatura a fin e la constituziun prescrivia elecziuns dal parlament. Uschia argumentescha Baschar al-Assad las elecziuns.

Per il correspundent dad SRF Philipp Scholkmann è quai dentant be ina stgisa. Atgnamain veglia il reschim dad Assad dar in signal politic a ses adversaris ed a l'entir mund e demussar che tut saja normal en Siria, ch'el resguardia la constituziun e ch'el haja anc adina la pussonza da l'entir pajais.

Las elecziuns èn ina farce e na midan insumma nagut.
Autur: Philipp Scholkmanncorrespundent SRF

Boicot e critica

En tut candideschan 3'500 persunas per ils 250 sezs. Pervi da la guerra civila pon dentant be circa 60% ir ad eleger - be la populaziun che viva en territoris controllads dal reschim da Baschar al-Assad.

Las partidas da l'opposiziun crititeschan perquai che las elecziuns dal parlament na sajan betg democraticas ed han appellà al boicot. Vi dal resultat na midia quai dentant nagut, declera Philipp Scholkmann:Il parlament restia era suenter las elecziuns sut controlla dal reschim. Baschar al-Assad veglia be demonstrar sia fermezza e cumprovar ch'el saja legitimà da reger en Siria - gist era en vista a la segunda runda dals discurs da pasch che cumenzan mesemna saira a Genevra.