Elecziuns en Mecklenburg-Vorpommern – AfD surpassa la CDU

Per ils cristiandemocrats da la chanceliera federala Angela Merkel èn las elecziuns parlamentaras en Mecklenburg-Vorpommern in debachel: la CDU vegn surpassada da la nova partida «Alternative für Deutschland». La SPD gudogna las elecziuns cun 30,6% da las vuschs.

Ils trais chi fan viva ensemen.

Legenda da maletgs: L'AfD fa festa - Alexander Gauland, Leif-Erik Holm e Beatrix von Storch a Schwerin suenter l'emprima projecziun da resultads. Keystone

La SPD resta cun 30,6% la forza pli ferma en Mecklenburg-Vorpommern, scriva dentant cun in minus da 5% perditas massivas. Uschia ils emprims resultads da las elecziuns parlamentaras.

Schleppa per Angela Merkel

Il partenari da coaliziun da la SPD, ils cristiandemocrats percunter crodan cun 19,0% da las vuschs sin il terz plaz. La partida da la chanceliera Angela Merkel vegn surpassada per l’emprima giada insumma tar in elecziun parlamentara da l’AfD. L’«Alternative für Deutschland» fa 20,8% da las vuschs e vegn uschia la segund ferma partida en Mecklenburg-Vorpommern. Quest resultat vala sco schleppa per la chanceliera Angela Merkel e sia CDU.

Gratulaziuns dals populists da dretga en Europa

Il success da la AfD ha plaschì als populists da la dretga en l'Europa. Sin Facebook e Twitter han gratulà tranter auter Marine Le Pen dal Front National da la Frantscha, Heinz-Christian Strache da la FPÖ en l'Austria e da Geert Wilders dals Pajais Bass.

L'AfD, la partida populistica da dretga è vegnida fundada pir avant 3 onns. Cun questa victoria entra ella gia en il 9avel parlament dals stadis federativs en Germania.

RR novitads 06:00+