Perquai che l'anteriura regenza da l'Israel ha pers la maioritad en il parlament datti novas elecziuns. Benjamin Netanjahu, ch'è stà in onn e mez en l'opposiziun, dastga sperar da returnar a la pussanza - er sch'el è il mument avant dretgira pervia da renfatschas da corrupziun.
Persuls na po il Netanjahu dentant betg cuntanscher la maioritad en il parlament israelian, la Knesset. Per furmar ina regenza dovra sia partida dretg-conservativa «Likud» sustegn, per exempel dal champ extremist da dretga, che pudess vegnir terz ferma forza en il parlament.
Las partidas arabas decidan probablamain la cursa
Da tschella vart èn las partidas centristicas, sanestras, arabas ed era duas dretgas. Lur manader e primminister actual Jair Lapid da la partida liberala «Yesh Atid» pudess dentant era avair bregia da furmar ina regenza. Il davos è sia coaliziun dada dapart. Sulettamain cun agid da las partidas arabas pudess el avair success, quai vala dentant sco pauc probabel.
Dals 1,3 milliuns arabs en l'Israel dastgan intgins votar, blers ch'abiteschan en la strivla da Gaza, a Jerusalem ed en il pajais el vest dal Jordan dentant betg.
Resultats pir gievgia
Las urnas per eleger il parlament israelian èn anc avertas fin mardi saira. La saira vegnan publitgadas emprimas prognosas – cun il resultat final n'èsi dentant betg da spetgar avant gievgia.