Siglir tar il cuntegn

Header

cuntegn

Elecziuns en Austria ÖVP e Verds gudognan – FPÖ e SPÖ perdan vuschs

Quatter mais suenter che la regenza dretg-conservativa da ÖVP e FPÖ ha fatg naufragi, ha l’Austria elegì questa dumengia anticipadamain in nov parlament. Radund 6,4 milliuns persunas cun il dretg da votar èn stadas clamadas a las urnas. Da quellas han passa in milliun persunas votà a scrit.

Suenter ch'ils locals d'elecziun han serrà a las 17:00, datti uss emprimas calculaziuns approximativas. Tenor quellas èn il conservativs da la ÖVP enturn Sebastian Kurz, ils clers victurs da las elecziuns. La partida vegn tenor las calculaziuns sin 37,2% da las vusch. Quei fiss in plus da 5,7 puncts procentuals en congual cun las elecziuns dal 2017.

FPÖ senta l'affera d'Ibiza

Laschar plimas sto tenor las calculaziuns dentant la partida da la dretga FPÖ. Suenter il scandal d’ibiza perda la FPÖ radund 10 puncts procentuals e vegn da nov anc sin 16%. In grond augment hai sper la ÖVP er dà per la Partida verda. Ella vegn tenor las calculaziuns sin radund 14,5% da las vuschs, quatter giadas uschè bler sco anc avant dus onns e returna puspè en il parlament.

Ils resultats definitivs vegnan spetgads en il decurs da la saira.

Kurz valeva gia ordavant sco favurit

Il favurit ed anteriur chancelier austriac, Sebastian Kurz, ha ditg gia il suentermezdi davant ses local electoral a Vienna che lur finamira saja clera: gudagnar las elecziuns. La dumonda che sa tschenta dentant è, schebain Kurz vesa puspè ina collavuraziun da la FPÖ en la regenza. Il politolog Peter Filzmaier di latiers:

video
Datti puspè ina cooperaziun cun la FPÖ?
Or da Tagesschau dals 29.09.2019.
laschar ir. Durada: 20 Secundas.

Elecziuns anticipadas pervi dad affera Ibiza

La coaliziun da regenza tranter la ÖVP e la FPÖ aveva fatg naufragi il matg pervi da l’uschenumnada «affera dad Ibiza» enturn il vice-chancelier Heinz-Christian Strache.

RR novitads 12:00

Artitgels legids il pli savens