Siglir tar il cuntegn

Header

cuntegn

Exteriur Elecziuns dal parlament en Gronda Britannia

La Gronda Britannia elegia anticipadamain ses parlament. Proclamà las elecziuns ha la primministra Theresa May, per rinforzar las atgnas retschas en vista als discurs da Brexit cun l’Uniun europeica. Ses cuntrahent Jeremy Corbyn ha dentant survegnì adina dapli attenziun las ultimas emnas.

L’avantatg da la partida conservativa (Tories), sin la partida d’opposiziun (Labour) è sa reducì pli e pli durant las emnas passadas. Quai mussan differentas retschertgas. Perquai n’èsi betg cler, sch’ils conservativs e la primministra Thresa May salvan vinavant la maioritad absoluta.

Theresa May sa preschenta sco leader

«Brexit ha num Brexit», accentuescha Theresa May adina puspè e vul realisar in dir tagl cun l'UE. Quai saja il giavisch da la populaziun. La primministra sa preschenta sco ferma manadra che vul pli gugent nagin deal cun l'UE ch'in che vala pauc.

audio
Bunura: Situaziun avant las elecziuns en Gronda Britannia
ord Actualitad dals 08.06.2017.
laschar ir. Durada: 3 minutas 39 Secundas.

Sut squitsch è Theresa May vegnida pervia da sia politica interna: Suenter ils attentats terroristics en Gronda Britannia è sia lavur sco anteriura ministra vegnida en la critica. Ella haja stritgà passa 20'000 plazzas tar la polizia. Ed era sia proposta da restrenscher ils dretgs umans en il cumbat cunter terrorists ha provocà l'opposiziun.

Jeremy Corbyn adina pli ferm

Jeremy Corbyn durant il cumbat electoral.
Legenda: Jeremy Corbyn durant il cumbat electoral. Keystone

En sia carriera è Jeremy Corbyn s'engaschà per temas classics da la sanestra: Segirar las rentas, schliar ils problems finanzials en il sectur da sanadad e promover la scolaziun. Puncts fa Jeremy Corbyn surtut era tar la giuventetgna, perquai vegn el magari cumpareglià cun il candidat per il presidi american Bernie Sanders.

En las discussiuns davart il Brexit, rinfatschan critichers dentant che Jeremy Corbyn haja mussà memia pauc format e memia pauc prontezza da cumbatter.

650 sezs en il parlament

La Gronda Britanna n'elegia dentant betg direct Thrersa May u Jeremy Corbyn, mabain ils 650 represchentants en il parlament. I vala dentant la regla nunscritta che quel che cuntanscha la maioritad surpiglia il timun da la regenza. Propi elegì vegn il prim-minister da la queen Elizabeth.

Actualmain han ils conservativs da Theresa May ina maioritad da 330 sezs. Cun il resultat da l'elecziun èsi da quintar la notg sin venderdi.

RR actualitad 07:00

Artitgels legids il pli savens