Siglir tar il cuntegn

Header

Navigaziun

Betg tuts votants han la dumengia pudì vuschar tenor plan.
Legenda: Betg tuts votants han la dumengia pudì vuschar tenor plan. Keystone
cuntegn

Exteriur Elecziuns communalas en l'Ucraina èn crudadas ora

En l'Ucraina èn las elecziuns communalas crudadas ora en 2 citads grondas. A Mariupol n'havevi la damaun nagins cedels da vuschar, sco in portal d’internet local «0629» communitgescha.

La citad da port cun radund 450’000 abitants è ina da las pli grondas citads en l'Ucraina da l'ost. Er a Krasnoarmiisk cun 65’000 abitants èn ils locals d'elecziun stads serrads. Latiers haja dà sporadicamain problems en ulteriuras citads.

Poroschenko pretenda nov termin

Il president da l'Ucraina Petro Poroschenko ha numnà catastrofal la renunzia da las elecziuns communalas en las 2 citads. El ha pretendì che la chaussa vegnia intercurida ed ha ordinà al parlament a Kiew da fixar uschè svelt sco pussaivel in nov termin d'elecziun.

Separatists pro-russ vulan atgnas elecziuns

En ils intschess Donezk e Luhansk che vegnan controllads dals separatists pro-russ n’èsi betg vegnì vuschà la dumengia. Ils rebels vulan organisar atgnas elecziuns la primavaira proxima.

30 milliuns han la schelta tranter 210’000 candidats

En il rest dal pajais han las elecziuns cumenzà tenor plan. Radund 30 milliuns persunas èn clamadas d’eleger parlaments regiunals, cussegls da citads e presidents communals. En tut sa participeschan 142 partidas e dapli che 210’000 candidatas e candidats per ils mandats locals. A Kiew spera l’ex-boxist Vitali Klitschko sin ina segunda perioda d’uffizi sco president da la citad.

RR novitads 14:00 / 17:00