Siglir tar il cuntegn
cuntegn

Exteriur Egyptair: Chattà registratur da vuschs da sgol MS804

En la Mar Mediterrana han ils investigaders chattà il registratur da vuschs da l'aviun da passagiers MS804 da l'Egypt Air. Quai communitgescha la cumissiun d'inquisiziun a Cairo. Ordavant aveva in bastiment spezial gia chattà plira tocca dal vrac.

Eroplan partent.
Legenda: La raschun per la crudada dal aviun da la societad aviatica egipziana n'è anc adina betg enconuschenta. Keystone

La blackbox registrescha las vuschs dals pilots, però er ramurs or dal cockpit.

L’impurtanta part da questa blackbox, il registratur da tuns, è restà intact. Il registratur da vuschs è dentant rut en plira tocca. L’equipa d'ina bartga speziala franzosa aveva avant annunzià d’avair chattà tocca dal vrac radund 290 kilometers en il nord da la costa egipziana. La tschertga è vegnida conduida en ina bassezza da fin 3’000 meters tranter l’Egipta e Creta.

Localisà tocca dal vrac

In bastiment spezial ha localisà en la Mar Mediterrana plirs lieus cun parts dal vrac da l'aviun da passagiers da la Egyptair ch'è crudà giu avant 4 emnas. Sco quai che la cumissiun d'inquisiziun a Cairo communitgescha, hajan ins er pudì transferir ils emprims maletgs. I vegn fatg ina carta dals tocs dal vrac.

L'aviun da passagiers cun 66 persunas a bord era crudà giu ils 19 da matg 2016 sin ses viadi da Paris a Cairo. La raschun per la disgrazia n'è anc betg sclerida.

RR novitads 06:00 / 16:00