Siglir tar il cuntegn
cuntegn

Exteriur Egipta survegn 20 milliuns francs da la Svizra

La Svizra ha pajà enavos a l'Egipta daners or da l'ambient da l'anteriur president egipzian Hosni Mubarak.

Hosni Mubarak.
Legenda: Suenter sia cupitgada èsi l'emprima giada che la Svizra paja enavos daners bloccads. Keystone

32 milliuns francs ha la Svizra pajà enavos a l'Egipta. I sa tracta da daners che tutgavan l'entschatta a l'um d'affars e politicher Ahmed Ezz.

Suenter la cupitgada da l'anteriur president Hosni Mubarak è quai l'emprima giada che la Svizra paja enavos daners bloccads or da ses ambient. Actualmain munta la summa da daners bloccads or da l'ambient da Mubarak anc a 400 milliuns francs.

Nagina cuntradicziun tar la procedura penala

Il pajament è tenor la gasetta «NZZ am Sonntag» stà pussaivel grazia ad ina cunvegn da reconciliaziun tranter l’Egipta e l’um d’affars.

Il pajament na stettia betg en cuntradicziun cun la procedura penala cunter Ezz en Svizra. La Svizra maina anc adina in process cunter sis persunas da l'ambient da Mubarak. Tranter auter èn er dus dals figls da Mubarak pertutgads. Ils accusads vegnan suspectads d'avair lavà daners e d'avair sustegnì organisaziuns criminalas.

Daners bloccads

Perquai che la Svizra na vul betg sustegnair acziuns illegalas blochescha ella daners, sch'i dat il suspect ch'i sa tracta da daners da potentats. Vul dir daners che persunas pussantas u lur conturn han acquistà a moda nungiustifitgada. Quai po esser a basa da corrupziun u d'auters crims.

RR novitads 16:00