Siglir tar il cuntegn
Inhalt

Exteriur Ecuador: Passa 320 persunas sparidas

Las equipas da salvament chattan adina dapli baras sut ils bajetgs sballunads - il mument discurra il minister da segirezza d'almain 413 morts e passa 2700 blessads. Tenor la Crusch cotschna èn almain 320 persunas anc sparidas.

Carta che mussa la regiun da Esmeralda.
Legenda: L'epicenter è stà en la regiun dad Esmeralda. Keystone

En l'Ecuador ha i dà la notg sin dumengia in grev terratrembel. L'observatori da terratrembels american discurra dad ina fermezza da 7,8. La regenza ha proclamà il stadi d'urgenza per l'entir pajais e tramess var 10'000 schuldads e 4'000 policists en la regiun. L'epicenter è stà en la provinza Esmeraldas radund 175 kilometers en il nord-vest da la chapitala Quito. Qua haja dà donns considerabels. Ils abitants sajan currids en panica sin via. Per part saja stà interrut il current electric e la rait da telefon. Era gidanters da l'ester, surtut dal Mexico e da la Columbia sajan participads a lavurs da salvament.

Las scurlattadas èn er stadas da sentir en il nord dal Peru ed en il sid da la Columbia. I saja il pli grev terratrembel en il stadi da las Andas dapi il 1979.

In hotel ch'è vegnì donnegià dal terratrembel.
Legenda: Il terratrembel ha procurà per donns considerabels. Keystone

Avertiment da tsunamis

Il center da tsunamis ha avertì dad undas giganticas en in conturn da 300 kilometers da l'epicenter. Las undas possian cuntanscher in'autezza da fin 1 meter. Las autoritads han appellà a la populaziun a la costa da banduar lur chasas. Las undas grondas n'èn dentant betg arrivadas.

L'Ecuador sa chatta sin l'uschè numnà rintg dal Pacific. Sin la tschinta da vulcans che circumdescha quasi l'entira platta dal Pacific fruntan gist pliras plattas continentalas ina sin l'autra. Quellas èn adina en moviment, uschia che terratrembels n'èn nagina raritad.

RR novitads 06:00/17:00