Siglir tar il cuntegn

Header

cuntegn

Exteriur Eclat tranter USA e Russia suenter attatga sin militar sirian

La coaliziun manada dals Stadis Unids da l'America ha attatgà en Siria ina basa da l'armada siriana.

L'ambassadura americana Samantha Power discurra en il cussegl da segirezza da l'ONU.
Legenda: L'ambassadura americana tar l'ONU Samantha Power en il cussegl da segirezza da l'ONU. Keystone

Tenor observaders sajan almain 60 schuldads vegnids per la vita, passa 100 sajan blessads. La coaliziun saja ida da quai anora ch'i sa tractia d'ina basa da la milissa terroristica Stadi Islamic e betg d'ina basa da l'armada, uschia il militar american.

La regenza americana deploreschia d'avair mazzà per sbagl numerus schuldads sirians.

Eclat tranter Stadis Unids da l'America e Russia

L'attatga en Siria lascha entant escalar las relaziuns tranter ils Stadis Unids e la Russia. La Russia reproscha a l'armada americana d'avair rut l'armistizi e d'avair mazzà senza resguard almain 60 schuldads. Curt suenter l'attatga aveva la Russia convocà ina sesida urgenta dal cussegl da segirezza da l'ONU. L'amabssadur russ tar l'ONU Witali Tschurkin ha entant bandunà la sesida cura che sia collega d'uffizi americana Samantha Power è vegnida latiers.

Power ha numnà la reacziun russa zinica ed ipocrita. Suenter attatgas dal reschim sirian sin la populaziun civila en Siria - n'haja la Russia mai reagì a moda sumeglianta.

Artitgels legids il pli savens