Siglir tar il cuntegn
Inhalt

Exteriur Dus morts tar bova datiers da Domodossola

En la Val Vigezzo en l'Italia èn crappuns crudads sin in auto. Las duas unfrendas èn da Locarno.

Bova.
Legenda: La bova ha sepulì in auto. Keystone
  • Sin autezza da la vischnanca taliana da Re ha ina bova sepulì in auto dumengia cunter saira.
  • Dus passagiers da l'auto èn morts. I sa tracta da d'in per da Locarno.
  • In ulteriur crappun è crudà sin la lingia da viafier Vigezzina che collia Domodossola cun Locarno. La lingia è interruttà.

Duas persunas èn vegnidas en ina bova damanaivel da Domodossola en l'Italia la dumengia. Quai rapporta l'agentura da novitads taliana Ansa.

La disgrazia è capitada en la Val Vigezzo datiers dal cunfin cun il Tessin. Crappuns èn crudads sin la via ed han sepulì l'auto da las duas persunas. La bova ha tratg l'auto plirs tozzels meters cun ella.

I pudess vegnir giu anc dapli

Per motivs da segirezza han las autoritads evacuà il conturn. Ins tema numnadamain ch'i pudess vegnir giu anc dapli material.

Via impurtanta

La via 337 collia la val d'Ossola ed il chantun Tessin. Betg mo blers turists, mabain er radund 1'5000 cunfinaris charreschan mintga di sin la via. Pervia da l'interrupziun ston ins far in sviament sur la Valle Cannobina che cuzza in'ura pli ditg.

Er la viafier è bloccada

In crappun ha er tutgà in traject da la viafier tranter Locarno e Domodossola. Quella è perquai interruta ed i charreschan bus da remplazzament.

Critica envers la politica

En Valle Vigezzo vegni adina puspè tar bovas ed i è er betg stà l'emprima giada che quellas han gì per consequenzas morts. Quai vilenta la glieud. Il burgamester dal vitg Re ha ditg envers l'agentura da novitads ansa: «Nus cumbattain dapi blers onns che la via vegnia segirada. Ch'i dat gia puspè in accident mortal è la culpa da la marschadetgna da la politica.»

Ed il manader da l'organ da coordinaziun dals cunfinaris ha ditg ch'i saja temp da dir «basta». Els pretendian definitivamain che la via statala vegn segirada. Ils daners sajan avant maun, ins sappia directamain cumenzar. Sch'i quai na vegni betg fatg, lura possian ils cunfinaris betg excluder mesiras da cumbat.

RR novitads 20:00