Siglir tar il cuntegn

Header

cuntegn

Exteriur Dus morts e sis blessads tar attatga terroristica en Finlanda

En la citad finlandaisa Turku ha in um attatgà pliras persunas cun in cuntè. Latiers èn duas persunas mortas, sis èn vegnidas blessadas, communitgescha la polizia. Ella suppona ch'i sa tractia dad in'attatga terroristica.

  • En la citad finlandaisa Turku èn otg persunas vegnidas attatgas cun in cuntè venderdi suentermezdi.
  • Duas persunas èn mortas, sis blessadas.
  • La polizia suppona ch'i sa tractia dad in'attatga terroristica.
  • La polizia ha arrestà l'attentader probabel. I sa tractia dad in Marocan da 18 onns. Ses motiv n'è anc betg enconuschent.

La polizia finlandaisa suppona che l'attatga haja gì in motiv terroristic. Quai ha ella communitgà la sonda. L'um che duaja avair cuntellà las persunas, saja vegnì arrestà suenter ch'ins haja sajettà ad el en la coissa. I a tractia dad in Marocan da 18 onns, ha communitgà la polizia.

En la chapitala Helsinki èn las mesiras da segirezza vegnidas rinforzadas a l'eroport ed a las staziuns. Turku è bun 170 kilometers en il sidvest da Helsinki. En la citad vivan radund 190'000 persunas.

Evità attatga sin il schef da regenza il 2012 a Turku

L'october 2012 era s'avischinà al schef da regenza da lez temp Jyrki Katainen in um cun in cuntè a Turku. L'um era para malsaun da spiert . Forzas da segirezza avevan franà l'um ad uras. La procura publica n'aveva betg instradà ina procedura penala cunter el.

RR novitads 17:00++

Artitgels legids il pli savens