Siglir tar il cuntegn

Header

cuntegn

Exteriur Dunnas da l'entir mund protesteschan cunter Trump

In di suenter la saramentaziun dal 45avel president american èn millieras da persunas idas sin las vias per protestar. Sulettamain en la chapitala americana Washington fan ils organisaturs quint cun 200’000 enfin 500’000 persunas. Ellas vegnan sustegnidas da protestas globalas.

Las protestas organisadas dad activistas per il dretg da las dunnas sa drizzan cunter anti feminissem, violenza, rassissem, homofobia ed intoleranza religiusa. Per l’occurrenza a Washington èn s’annunziadas er diversas persunalitads- uschia las acturas Ashley Judd e Scarlett Johansson, il reschissur Michael Moore, la feminista Gloria Steinem e la defensura dal dretg civila Angela Davis.

La chapitscha pinca è lur simbol

Suenter la partenza l’avantmezdi vul il til ir vers las Chasa Alva. Bleras participantas portan chapitschas pincas. Quellas èn vegnidas fatgas cun stgaina avant la demonstraziun en tschientmillis. Il simbol da la chapitscha pinca è vegnì prendì si en divers pajais sco simbol da solidaritad.

Protestas globalas sco segn da solidaritad

Er en las citads da Los Angeles, Chicago, New York e Boston èn planisadas demonstraziuns. A Boston vegnan spetgadas 100’000 persunas. Tut en tut eran annunziadas passa 600 acziuns da protesta pli grondas en ils Stadis Unids. Las demonstrantas americanas vegnan sustegnidas da diversas demonstraziuns sin l’entir mund.

Marsch en Svizra era a Genevra

Al sulet marsch da las dunnas en Svizra èn sa participadas a Genevra radund 2'500 persunas. Era sche il president american Donald Trump n’è betg vegnì numnà persunalmain era quai cler che la manifestaziun sa drizzia cunter Trump. En in appel da l’anteriura cussegliera federala Micheline Calmy-Rey fa ella curaschi a dunnas giuvnas da s’engaschar en la politica.

Gia il venderdi avevan millis da persunas protestà en l'entir mund cunter Trump. A Washington èn vegnidas arrestadas passa 200 persunas suenter escalaziuns.

RR novitads 12:00+

Artitgels legids il pli savens