Siglir tar il cuntegn

Exteriur Dumber da fugitivs interns crescha

Tenor novas stimaziuns èn l’onn passà 31,1 milliuns persunas vegnì stgatschadas da lur dachasa pervia da catastrofas natiralas e guerras. Cun il midament dal clima savess quai dumber anc daventar pli gronds.

In maletg d'ina inundaziun sin las Filippinas dal 2016.
Legenda: Dapli fugitivs pervia da catastrofas natiralas. Keystone

Il dumber dals fugitivs interns, vul dir da quels che restan en lur pajais saja duas giadas uschè grond sco quel da las persunas che fuin ord il pajais. I saja perquai necessari da metter ils fugitivs interns pli ferm en il center da l’interess. Quai pretenda il post d'observaziun per stgatschads interns e l'organisaziun da fugitivs «Norwegian Refugee Council» (NRC).

Pertutgads il pli ferm sajan la Republica Federala Congo e la China, anc pli ferm che la Siria e l'Irak. Sin l'entir mund sajan passa 31 milliuns persunas vegnidas stgatschadas l'onn passà pervi da catastrofas e guerras; 3 da 4 pervi dad inundaziuns, orcans, incendis da guaud u nauschas cundiziuns da l'aura.

Dapli fugitivs pervia dal midament climatic

En la China haja quai ord da quellas raschuns dat 7,4 milliuns persunas stgatschadas. Sin las Filippinas hajan 5,9 milliuns umans pers lur dachasa ed en l’India 2,4 milliuns. Il NRC tema ch’il midament da clima possia anc augmentar fermamain quai dumber en l’avegnir.

RR novitads 14:00