Siglir tar il cuntegn

Exteriur Duel electoral en la Grezia

Paucs dis avant l’elecziun dal parlament en la Grezia han ils 2 concurrents principals, l’anteriur primminister Alexis Tsipras ed il schef da la partida conservativa Evangelos Meimarakis, manà in duel en televisiun. Quasi tut ils emetturs en Grezia han purtà quel.

Alexis Tsipras ed Evangelos Meimarakis.
Legenda: Ils 2 contrahents avant il duel electoral. Keystone

Gia a l’entschatta dal duel ha Tsipras exclus che sia partida la Syriza vegnia a furmar ina coaliziun cun la partida conservativa. Ina gronda colliaziun fiss ina coaliziun betg natirala, ha Tsipras ditg. Pussaivel saja dentant che sia partida sa collia cun partidas pli pitschnas.

Meimarakis da sia vart n’ha betg vulì excluder da principi ina coaliziun gronda per manar il pajais ord la crisa. La Grezia basegnia ina squadra naziunala politica, ha Meimarakis ditg.

Tut las retschertgas mussan per dumengia che vegn in cumbat piz a cup tranter la partida da Tsipras Syriza e la partida conservativa da Meimarakis.

RR Novitads 09:00