Siglir tar il cuntegn
cuntegn

Exteriur Duas blessadas grevamain tar accident en il Tirol

En l'Austria, en il Tirol, ha in accident cun in bus tudestg chaschunà pliras persunas blessadas. Duas dunnas èn blessadas grevamain. Tenor la polizia è l'accident a Zirl capità perquai ch'ina automobilista ha pers la controlla da ses vehichel.

Purtret dal bus che giascha en ina scarpa.
Legenda: Tar l'accident cun in bus bavarais èn duas dunnas vegnidas blessadas grevamain. Keystone

L'automobilista è collidada cun il bus che vegneva encunter. Lez è collidà cun ulteriurs autos avant ch'el è glischnà radund 10 meters d'ina spunda giuador. Las duas dunnas en l'auto da persunas èn vegnidas blessadas grevamain.

Il bus cun 29 passagiers era partì dad Augsburg. Il manischunz dal bus para d'avair impedì il mender. El haja regì svelt e laschà ir il bus da la spunda giu encunter las plantas. Uschia na saja il bus betg cupitgà. Ils passagiers han gì grond cletg. Mo ina persuna en il bus è vegnida blessada levamain. En tut èn rodund 10 persunas vegnidas blessadas levamain.

L'accident saja capità perquai che la dunna da l'auto da persunas haja pers la controlla en ina storta e saja pitgada en il bus. Pertge che la dunna haja pers la controlla dal vehicul n'era la saira anc betg conuschent. Las duas dunnas han stuì vegnir tagliadas or dal vrac da l'auto. Ina da las dunnas è vegnida transportada en ina clinica austriaca, l'autra en in ospital german.

Las persunas betg blessadas han pudì spetgar sin ina staziun da paus sin il bus da reserva. En tut èn rodund 200 pumpiers, policists, salvaders e gidanters stads en acziun.

RR novitads 08:00