Siglir tar il cuntegn
cuntegn

Exteriur Dretgira retegna scumond d’entrada da Trump

Schleppa per Donald Trump: Persunas pertutgads dal scumond d'immigrar na dastgan ad interim betg vegnir tramess enavos.

Demonstrants a Ney York.
Legenda: Demonstrants a Ney York. Keystone

Fugitivs immigrats dapi venderdi en ils Stadis Unids e visitaders da pajais pertutgads dal scumond d'immigrar na dastgan ad interim betg vegnir tramess enavos en lur patria sch'els hajan in visum valaivel. Quai ha decis ina dretgira a New York suenter l'ordinaziun dispitaivla dal president Donald Trump.

Reacziuns da la Gronda Britannia e dal Canada

Las regenzas da la Gronda Britannia e dal Canada sa distanzieschan dal scumond d'immigrar dal president american. Il primminister canadais Justin Trudeau ha ultra da quai declerà ch'il Canada dettia albiert als fugitivs pertutgads dal decret en ils Stadis Unids.

Cun ses decret vul Trump tegnair davent da ses pajais terrorists islamistics.

Ulteriurs decrets

Ultra da quai ha il president american Donald Trump incaricà ses stab general da preschentar aifer 30 dis in plan co cumbatter la milissa terroristica dal Stadi Islamic. En tut ha Trump fin ussa suttascrit 18 decrets aifer sia emprim'emna en uffizi.

Il ministeri american da segirtad ha communitgà da realisar las ordras dal president Donald Trump per garantir la segirtad dal pievel american.

Posziun da la chanceliera tudestga Angela Merkel

La chanceliera tudestga Angela Merkel è dal maini ch'il scumond per fugitivs e burgais muslims d'entrar en ils Stadis Unids da l'America saja in sbagl. Ella saja persvadida ch'il cumbat actual encunter il terrorissem na lubeschia betg da metter glieud d'ina tscherta derivanza cun ina tscherta cardientscha sut suspect general. Quai è vegnì declerà da la regenza tudestga a Berlin.
RR actualitad 06:00