Siglir tar il cuntegn
Inhalt

Exteriur Donald Trump – uss vegn investigà cunter el

En ils Stadis Unids haja l'investigader spezial Robert Muller cumenzà cun investigaziuns cunter il president Donald Trump. Quai rapporta la gasetta Washington Post.

El sin la pista ver l'aviun.
Legenda: Il president american Donald Trump suenter in discurs ils 13 da zercladur a Milwaukee en il stadi federativ da Wisconsin. Keystone

La gasetta Washington Post sa basa sin persunas ch'enconuschan la chaussa – dentant senza far nums.

Trump duaja avair prendì influenza da maniera betg lubida

Al president Trump vegn rinfatschà, ch'el haja empruvà en l'affera da la Russia d'influenzar nunlubidamain la giustia. Questas rinfatschas vegnian examinadas, uschia hai num en il rapport da gasetta.

Enfin uss sa drizzavan las investigaziuns cunter persunas en il ravugl da Trump. Il president american sez aveva accentuà adina puspè ch’i na vegnia betg investigà encunter el persunalmain. Tenor il schef dal FBI relaschà, James Comey, saja questa tematica er stada preschenta en ils discurs sut quatter egls, ch’el aveva cun il president.

Investigader spezial Mueller – in um cun renum

L'anteriur schef dal FBI, Robert Mueller, è vegnì nominà dal ministeri da giustia sco investigader spezial. El giauda in num excellent sco investigader.

En il curs da las investigaziuns, uschia scriva l’agentura da novitads svizra sda, saja vegnì discutà en circuls dal president, che quel considereschia da relaschar a Robert Mueller. La Chasa Alva a Washington ha dentant dementì quai.

RR novitads 06:00+