Siglir tar il cuntegn
Inhalt

Exteriur Donald Trump schocchescha il Puerto Rico

Tar sia visita sin l'insla devastada ha il president american cunzunt accentuà il dumber d'unfrendas bass.

Donald Trump ha schoccà ils abitants da Puerto Rico. L’emprim ha el laschà quasi duas emnas temp fin ch'el ha visità l'insla ch'il hurican «Maria» ha devastà dal tuttafatg. Ed ussa n'è el betg sa preschentà sco manager da crisa, mabain ha fatg in commentari deplazzà.

«Sch'ins guardia ina vaira catastrofa sco tar il hurican «Katrina» il 2005 cun tschients morts e vesa, tge ch'è capità qua dal stemprà cun 16 morts, lura pudais vus esser loschs» ha el declerà.

Stemprà desastrus

«Maria» ha tutgà il Puerto Rico frontalmain e devastà grondas parts da l'insla che tutga tar ils Stadis Unids. Ils blers dals 3,4 milliuns abitants da l'insla èn anc adina senza current electric. Ultra da quai na dettia betg avunda aua da baiver schubra, mangiativas e medicaments. Quai ha communitgà il guvernatur dal Puerto Rico, Ricardo Rosselló.

Ultra da quai ha el curregì il dumber d'unfrendas sin almain 34. El stima ils donns sin radund 90 milliardas dollars. I sa tracta dal pli desastrus stemprà dapi 90 onns en il Puerto Rico.

RR novitads 10:00