Donald Trump n'è betg da franar

Il milliardari da New York gudogna er l'elecziun primara a Nevada. Quai rapportan plirs emetturs da televisiun americans.

Donald Trump durant in eveniment dals republicans a Nevada.

Legenda da maletgs: Donald Trump gudogna, gudogna e gudogna. Fin uss ha il milliardari gudagnà 3 da 4 elecziuns primaras. Keystone

Donald Trump gudogna l’elecziun primara dals Republicans en il stadi federativ Nevada. Suenter che tut las vuschs èn dumbradas, vegn Trump sin 45,9% da las vuschs. Quai communitgescha la cumissiun electorala.

L'interprendider da 69 onns survegn uschia cleramain dapli vuschs che ses concurrents Marco Rubio (23,9%) e Ted Cruz (21,4%).

Nevada è uschia gia il terz stadi suenter South Carolina e New Hampshire ch’è per Donald Trump. Sulet en il stadi federativ dad Iowa ha Ted Cruz triumfà.

Al «Super Tuesday» il prim da mars datti in veritabel maraton d'elecziuns primaras dals republicans. Lura datti elecziuns en 12 stadis federativs.

Tar ils democrats n’hai oz dà naginas elecziuns. La proxima elecziun primara dals democrats è ils 27 da favrer a South Carolina.

RR novitads 07:00