Donald Trump n'è betg l'emprim president american che relascha blers decrets al cumenzament da ses uffizi. Decrets fan part da las cumpetenzas executivas d'in president american ed han vigur legala – sch'els na cuntrafan betg al dretg u a la constituziun.
Mintga suttascripziun è ina show
Auter che ses antecessurs insceneschia Donald Trump dentant mintga decret ch'el suttascriva, di James Davis, professer per politologia a la HSG Son Gagl e sez burgais dals Stadis Unids. Ed el crititgescha era che quels decrets na sajan betg preparads bain, mabain cuntegnian spazi per interpretaziuns.
Cun relaschar decrets veglia Donald Trump mussar ch'el realiseschia tant pli spert las empermischuns fatgas en il cumbat electoral. Anteriurs presidents americans hajan plitost fatg quai per betg stuair debattar las ideas en il congress – sco p.ex. Barack Obama che n’ha gì nagina maioritad en il parlament. Ina tala resistenza na stuess Donald Trump betg temair: Omaduas chombras parlamentaras èn en ils mauns da sia partida, dals republicans.
Opposiziun datti dentant: En numerusas citads en ils Stadis Unids e sin l'entir mund è vegnì demonstrà cunter il decret che scumonda a persunas da 7 stadis muslims d'immigrar en ils Stadis Unids. E singuls stadis, sco p.ex. Washington, han annunzià da purtar plant cunter il decret.
«Sch'el vegn crititgà, lura va el en l'offensiva»
Tala critica possia ni irritar ni influenzar Donald Trump, accentuescha il politolog James Davis. Anzi: Sia resposta sin critica saja dad immediat puspè ir en l'offensiva cun novas ideas, novs projects, novas pretensiuns.
Donald Trump na pensa savens betg a fin sias ideas.
A lunga vista na saja quai nagin recept per reger ils Stadis Unids, concluda l'expert. Insacura stoppia Donald Trump midar sia strategia e cumenzar cun refurmas che dovran las debattas en il congress, sco p.ex. ina refurma da sanadad u da la taglia.
Decisiuns da Donald Trump:
20-01 | Reducir custs dad Obamacare. | Decret |
Annullar regulaziuns dad Obama aifer l'administraziun. | Memorandum | |
23-01 | Sa retrair da la cunvegna da commerzi transpazifica TTP. | Memorandum |
Lubir daners da svilup be ad organisaziuns che porschan nagin abort. | Memorandum | |
Scumandà d'engaschar nov persunal per la regenza. | Memorandum | |
24-01 | Lubì projects per pipelines dad ieli che Obama aveva scumandà. | Memorandum |
Schlargiar la producziun en il Stadis Unids. | Memorandum | |
Bajegiar pli spert lieus da producziun en ils Stadis Unids. | Decret | |
25-01 | Construir in mir al cunfin cun il Mexico per franar l'immigraziun illegala. | Decret |
Interpretar uschè rigurus sco pussaivel las leschas da migraziun. | Decret | |
27-01 | Scumandà a persunas da 7 stadis muslims d'entrar en ils Stadis Unids. | Decret |
Analisar il stan dal militar american. | Memorandum | |
28-01 | Scumandà ad anteriurs collavuraturs da la regenza da far lobbying. | Decret |
Il schef-strateg ed il schef dal stab fan part al cussegl naziunal da segirtad. | Memorandum | |
Preschentar aifer 30 dis in plan co cumbatter il Stadi Islamic. | Memorandum | |
30-01 | Stritgar duas regulaziuns veglias avant ch'ina nova vegn introducida. | Decret |
Relaschà procuratura publica Sally Quillian Yates. |
RR actualitad 07:00+