Siglir tar il cuntegn
Inhalt

Exteriur Dispita tranter Trump e medias da massa escalescha

Divers reporters èn vegnids sclaus da l'ura da dumondas. Tranter auter sajan reporters da CNN, la New York Times e Politico stads pertutgads. L'agentura da novitads AP ed il Time Magazine han sin quai boicottà l'ura da dumondas. Autras agenturas e schurnalists han mess en protest.

Purtret da Donald Trump.
Legenda: Trump sclauda schurnalists da l'ura da dumondas. Reuters

Trump ha sclaus divers reporters da l'ura da dumondas en la Chasa alva. Curt avant aveva el accentuà che las medias sajan l'inimi da la populaziun americana. Uschia insatge haja quai anc mai dà en la lunga istorgia da bleras regenzas da differentas partidas, ha ditg il schefredactur da la New York Times, Dean Baqet.

CNN respunda uschia sin twitter

Quai saja absolutamain inacceptabel co Trump tractia ils schurnalists. Quai pari d'esser la moda e maniera co ins vegnia tractà sch'ins rapportia davart fatgs che na plaschian betg a Trump. Els vegnian dentant tuttina a rapportar vinavant.

Numnà nagin motiv

Il pledader da Trump, Sean Spicer ha remplazzà la conferenza da pressa che vegn normalmain transmessas live en la televisiun cun in'ura da dumondas senza cameras. Quai n'è en sasez nagut spezial. Da sclauder tscherts schurnalists d'ina tala ura dentant schon. In motiv per quest agir n'ha Spicer betg numnà.

«Grond privel per noss pajais»

Il president american, Donald Trump ha gia pliras giadas attatgà las medias ed ha gia durant sia campagna per las elecziuns da president sclaus tscherts schurnalists da sias occurrenzas. Tranter quellas eran la Washington Post, Politico, BuzzFeed e la Huffington Post.

Il venderdi aveva Trump crititgà ch'i vegn duvrà mintgatant funtaunas anonimas. En in pled ha Trump pretendì che tschertas medias inventian novitads, ellas n'hajan naginas funtaunas, ellas s'imagineschian quai. Trump ha era attatgà la libertad da la pressa:

I na duess betg pli esser lubì da duvrar funtaunas sch'ellas na numnan betg tgi ch'igl è.
Autur: Donald TrumpPresident dals Stadis Unids

Sin Twitter ha el attatgà la New York Times e CNN directamain. El ha scrit che quellas medias scrivian sappientivamain "Fake-News", pia novitads faussas quai saja in grond privel per ils Stadis Unids.

En ils Stadis Unids tema uss la cuminanza da correspundents, WHCA che la libertad da pressa en ils Stadis Unids pudess vegnir restrenschida.

RR novitads 06:00