Siglir tar il cuntegn
Inhalt

Exteriur Dispita da visa: Tirchia smanatscha a l'UE

Il minister da l'exteriur pretenda d'abolir l'obligatori da visum fin l'october. A Brüssel rest'ins dentant ruassaivel.

Politicher.
Legenda: Smanatscha a l'Uniun europeica: il minister da l'exteriur tirc. Keystone

En la dispita da visa cun la Tirchia na vul la cumissiun da l'UE betg sa laschar metter sut squitsch da las smanatschas d'Ankara. La libertad da visa per ils burgais tircs dettia pir, sche tut las cundiziuns sajan ademplidas, ha ditg ina pledadra da la cumissiun da l'UE.

Avant aveva il minister da l'exteriur tirc Mevlüt Cavusoglu smanatschà en la gasetta tudestga «Frankfurter Allgemeine Zeitung» da vulair desdir il pact da fugitivs sch'ils burgais tircs na survegnan betg la libertad da visa fin l'october 2016.

Il pact da fugitivs tranter l'UE e la Tirchia prevesa che la Tirchia prenda enavos tut ils migrants ch'èn fugids en la Grezia. Per mintga fugitiv sirian refusà surpiglia l'UE in auter fugitiv sirian ord la Tirchia. L’admissiun da sirians tras l'UE è vegnida fixada sin 72’000.

RR novitads 23:00