Siglir tar il cuntegn

Header

las forzas da salvament en la notg.
Legenda: Bad Aibling - la notg passada è vegnida chattada morta l'ultima persuna sparida. Reuters
cuntegn

Exteriur Disgrazia da tren - «sbagl uman»?

En Germania rapporteschan emprimas medias da «sbagl uman» sco causa da la disgrazia. Las medias sa refereschan a funtaunas tar ils investigaders. La vart uffiziala haja detg, ch'ella na prendia anc betg posiziun en caussa.

Al di suenter la disgrazia sa concentreschan las investigaziuns sin la raschun per l’accident. Tenor emprimas investigaziuns hajan umans causà il sbagl fatal, rapporteschan l’agentura da pressa tudestga dpa ed ina rait redacziunala tudestga.

Probablamain na vegni betg a dar dapli che 10 persunas mortas

Dal lieu d’accident èn vegnidas questa bun'ura infurmaziuns contradictorias da la tschertga. Ch'ina persuna saja anc adina sparida è vegnì dementì curt avant las 09:00 dad in pledader da la pulizia: «I na vegn a dar nagina 11avla bara». Enpli è el sa mussà optimistic, che tut las persunas blessadas vegnan a restar in vita.

I na vegn a dar nagina 11avla bara.
Autur: Pledader presidi da polizia,Baviera Sura

Rumir sin il lieu d'accident è difficil

Sil lieu d'accident duajan vegnir las maschinas grevas per pudair cumenzar da distatgar ils 2 vracs da tren encugnads in en l’auter. Cun quai ch’els eran collidads probablamain senza franar, eran sa sviluppadas forzas enormas.

Tar la conferenza da medias il glindesdi suenter la disgrazia, aveva raquintà il schefmedi d’emergenza da purtrets desastrus e gidanters schoccads. Era il minister da traffic tudestg, Alexander Dobrindt, era visiblamain schoccà, cura ch’el ha resumà sias infurmaziuns suenter la visita sin il lieu da la disgrazia.

RR novitads 08:00+

Il pli impurtant da l'accident dal gliendesdi:

  • Tar la collisiun da dus trens regiunals en vischinanza da Bad Aibling moran 10 persunas, 18 persunas èn sa blessadas greivamain, 63 persunas leivamain.
  • Ils 2 locomotivists na vegnan betg ad avair survivì.
  • Ils 2 trens èn collidads cun aulta sveltezza frontalmain sin in traject a binari simpel. Da la causa da l'accident na datti anc betg novas.

Las forzas da salvament eran cun radund 700 persunas, diversas ambulanzas, bartgas e helicopters sin il lieu per gidar als passagiers dals 2 trens. Ellas èn vegnidas sustegnidas da forzas da l'Austria. Pervi da la topografia era la situaziun per las forzas da salvament fitg difficila.

L'accident è capità amez il traffic da pendularis

En il curs da l'avantmezdi è s'augmentada la cifra da las persunas mortas cuntinuadamain enfin ad 11, cura che l'ultima persuna sparida è vegnida chattada morta la notg suenter l'accident. Ina tschientina da persunas è vegnida ferida, per part fitg grevamain. L'accident è capità la bun'ura las 6:48, amez il traffic da pendularis. Sco che la polizia ha communitgà a la conferenza da presssa suenter l'accident eran circa 150 passagiers en ils 2 trens. En il trens mancavan ils scolars cun quai ch'igl è actualmain temp da vacanzas da tschaiver.

Merkel: «Jau sun era tar ils blessads»

En il spiert saja ella era tar ils numerus blessads che han da cumbatter cun las consequenzas da la disgrazia. Quai ha detg la chancelliera tudestga Angela Merkel. Plinavant ha ella engrazià als servetschs da salvament da la regiun.

Las investigaziuns sa concentreschan sin la causa da l'accident

Ils dus trens regiunals eran collidads frontalmain sin il traject tranter Bad Aibling e Kalbermoor, radund 50 km en il sidost da München. Il traject ha mo in binari, el è electrifitgà ed equipà cun in sistem da segirezza, che fraina trens automaticamain, sch'els surpassan in signal cotschen.

In glindesdi davomezdi eran ils collavuraturs da l'uffizi da tren tudestg sin il lieu per analisar las circumstanzas da l'accident. En ils trens eran 3 black-boxes, che han registrà il accident. Quai ha communitgà il minister da traffic tudestg, Alexander Dobrindt, a la conferenza da medias a Bad Aibling.

Chi’ns stoppia presumar, ch’ils trens sajan collidads cun auta sveltezza auta e senza avair frainà, ha Dobrindt raquintà. Pervi da la topografia na hajan ils dus locomotivists betg sa pudì verer avant che lur trens èn collidads.

RR novitads 10:00+