L’impurtant en furma concisa:
- Greva disgrazia da tren en l’India cun dapli che 140 morts e dapli che 200 blessads.
- Almain 14 vaguns èn sviads dals binaris. La raschun per l’accident n'è anc betg clera.
- Il tren disgrazià è in tren a lunga distanza ch’era sin via en il stadi federativ Uttar Pradesh.
Vers las 03:00 temp local è in tren a lunga distanza svià dals binaris en il stadi federativ Uttar Pradesh en la vischinanza da la citad Pukhrayan. Almain 14 vaguns èn sviads dals binaris.
«Trais vaguns è destruids cumplettamain», ha ditg Daljeet Singh Choudhury, in policist responsabel ad Uttar Pradesh. «Il dumber da morts pudess anc crescher.»
Raschun nunclera
Fin dumengia a bun’ura n’era la raschun da l’accident anc nunclera, ha ditg il pledader da viafier Vijay Kumar. Dapli che 20 ambulanzas transporteschian ils blessads sur radund 100 kilometers a Kanpur.
Il minister da viafier Suresh Prabhu ha annuzià in’examinaziun detagliada da l’accident.
Bass standards da segirezza
Ils trens en l’India transporteschan mintga di radund 23 milliuns umans en radund 12’000 trens. La gigantica rait da viafier vegn savens numnada «l’avaina da vita da la naziun», perquai che Inds da tuttas castas e classas dovran ella. La rait era vegnida construida dals patruns colonials englais per transportar als ports raubas sco mangola.
Dapi l’independenza da l’India da l’onn 1947 n’èn strusch pli vegnids construids novs binaris. La raschun: La viafier è preoccupada da mantegnair la rait existenta. Mintg’onn datti en l’India grevs accidents da tren cun blers morts.
Ultimamain aveva la regenza indica annunzià da vulair far pli segira ed economica la viafier cun investiziuns da pliras milliardas.
RR novitads 07:00