Siglir tar il cuntegn

Header

Navigaziun

Il minister da finanzas grec Giannis Varoufakis avant la bandiera da l'UE.
Legenda: Il minister da finanzas Giannis Varoufakis vul terminar la politica da spargn "betg sociala" da la Grezia. Keystone
cuntegn

Exteriur Discurs tranter l'UE e la Grezia fan naufragi

Ils discurs dals ministers da finanzas da la zona d'euro cun la Grezia èn ids a fin senza resultat, uschia hai num ord circuls dal cussegl da l'UE. Il minister da finanzas grec Giannis Varoufakis ha refusà mintga proposta da cumpromiss, sez ha el dentant fatg naginas propostas.

Curt avant che l'inscunter è ì a fin aveva la televisiun statala grecca gia rapportà ch'ils discurs hajan fatg naufragi. La regenza d'Alexis Tsipras n'è betg pronta da prolungar il program d'agid actual, gist quai vulan dentant ils auters ministers da finanzas.

Anc betg serrà las portas

La gruppa da l'euro dat la chaschun a la Grezia da mussar enfin la fin da l'emna sia prontadad da cumpromiss, quai ha ditg il schef da la gruppa Jeroen Dijsselbloem suenter l'inscunter. Sche la Grezia inoltrescha ina dumonda per prolungar il program d'agid sajan els pront d'organisar ulteriurs discurs il venderdi. Il program d'agid va a fin la fin dal mais.

(RR novitads 06:00)