Exteriur - Discurs d'atom cun l'Iran restan stentus
Ils discurs d'atom cun l'Iran sa sviluppan vinavant stentus. Ils discurs sajan bain stads positivs, ils resultats sajan dentant plitost modests fin uss. Quai ha ditg il viceminister da l'exteriur iranais Abbas Araghchi suenter avair scuntrà sia collega americana.
Ils discurs a Genevra cuntinueschan quests dis. La finamira dals discurs d'atom è d'avair fin il mars in accord politic e fin il fanadur in accord cumplessiv davart il program d'atom iranais. La dispita d'atom dura dapi 12 onns. Il vest vul evitar che l'Iran bajegia ina bumba d'atom.
