Discordia tranter la China ed ils Stadis Unids cuntinua

La China spera ch'i na dettia ina guerra commerziala cun ils Stadis Unids sut Donald Trump - e confiszescha ina drona da perscrutaziun en il mar chinais dal sid: Las tensiuns tranter la China ed ils Stadis Unidshan survegnì la sonda nov pavel.

Frontispizis da las gasettas.

Legenda da maletgs: Las reacziuns da las gasettas chinaisas sin l’elecziun da Trump sut il titel «La cunterattatga dal outsider». Keystone

Dapi ch'il futur preisdent american Donald Trump aveva telefonà als 3 da december cun la presidenta dal Taiwan, Tsai Ing Wen, n'èn las relaziuns tranter el e la China betg pli las meglras. Uss survegnan questas nov pavel.

Ina guerra commerziala donnegiass ils Stadis Unids e la China

La China spera ch’i na dettia nagina guerra commerziala cun ils Stadis Unids sut presidi da Donald Trump. Quai ha declerà il viceminister da finanzas chinais ad ina conferenza d’economia. Omadus stadis patissan dad ina tala guerra.

Il futur president dals Stadis Unids, Donald Trump, aveva annunzià d’introducir dazis d’import per products chinais. Plinavant fa el responsabel la China da manipular las devisas.

La China confiszescha ina drona da perscrutaziun americana

La China ha confiscà en la part internaziunala da la Mar Sidchinaisa ina drona da perscrutaziun sutmarina dals Stadis Unids. Quai ha rapportà l’emettur CNN sa referind a circuls militars.

Tenor CNN era ina bartga da perscrutaziun da la marina americana, la USNS Bowditch, per prender a bord ina da sias dronas da perscrutaziun, ch’ina bartga da guerra chinaisa è arrivada sin il lieu. Ils Chinais hajan pestgà la drona americana or da la mar ed han prendì ella cun sai.

Il futur president american ha gia crititgà l’acziun via Twitter: La China haja «engulà» la drona or da l’aua internaziunala e prendì ella en in «maiudì» en China:

Las quaidas territorialas da la China en la Mar Sidchinaisa procuran gia dapi decenis per in conflict en regiun. Uschia pretenda la China radund 80% dal mar sco territori chinais.

RR novitads 17:00