Exteriur - Dischoccupaziun greca è record tranter pajais da l'euro
La Grezia ha anc adina la pli auta quota da dischoccupaziun da tut ils pajais da l'euro, er sch'ella è tschessada l'avrigl sin 25,6%. Cumpareglià cun l'avrigl 2014 è quai ina sbassada dad 1,4%.
Tenor medias indigenas tschentian adina dapli grecs la dumonda per novs passaports. Quest augment haja cumenzà cura ch'il schef da la regenza, Alexis Tsipras, haja fixà la votaziun davart mesiras da spargn dals crediturs internaziunals. La gasetta greca valitescha quai sco indizi che blers Grecs vulan emigrar or da tema d’in «Grexit».
