Siglir tar il cuntegn
Inhalt

Exteriur Dira critica da la Germania en l'affera da spiunascha

En l'affera pervia d'ina probabla acziun da spiunascha en Germania - e quai per incumbensa dal servetsch secret svizzer - vegn la critica envers la Svizra pli dira.

Il ministeri da finanzas da Nordrhein-Westfalen: Er qua duai il servetsch secret svizzer avair plazzà in spiun.
Legenda: Il ministeri da finanzas da Nordrhein-Westfalen: Er qua duai il servetsch secret svizzer avair plazzà in spiun. Keystone

Il schef da fracziun da la SPD, Thomas Oppermann ha ditg ch'el saja indignà ch'il spiun svizzer saja vegnì engaschà a Nordrhein-Westfalen cun ina incumbensa uffiziala. La Svizra sa mettia uschia da la vart da lavada da daners ed omissiun fiscala. El spetgia ussa era che la regenza tudestga s’exprimia cleramain en chaussa.

Betg mo critica dira

In zic pli miaivel tuni tar auters politichers tudestgs. Il minister da l'exteriur Siegmar Gabriel ha numnà l'entira chaussa «pli u main incredibel». El ha era fatg attent che tenor indicaziuns dals collegas svizzers na dettia quai il mument naginas activitads da spiunascha svizra, almain naginas uffizialas. Quai stoppia uss il procuratur federal general sclerir.

Il minister da finanzas tudestg, Wolfgang Schäuble ha ditg la sonda vers la critica or da las retschas da la SPD: El tegnia nagut dad ingiurias publicas vers lur partenaris e vischins. La Svizra saja in stadi da dretg ed uss saja da spetgar giu las inquisiziuns.

RR novitads 18:00