La chasa alva a Washington DC ha communitgà ch'els vegnian immediatamain a cumbatter questa decisiun giuridicamain. La decisiun da revocar il scumond d'entrar valia en ils Stadis Unids entirs, hai num en l'argumentaziun dal derschader. La decisiun elimineschia per immediat il decret da Trump, ha ditg il derschader federal da Washington, Bob Ferguson. Avant avevan medias indigenas rapportà ch'ils Stadis Unids hajan revocà quasi 60'000 visas en l'emprim'emna suenter il scumond d'entrar en il pajais.
Legitim ed adequat
Suenter la sentenzia da Seattle ha la Chas'alva a Washington annunzià da vulair far recurs uschè svelt sco pussaivel cunter questa decisiun. Il pledader Sean Spicer ha ditg ch'ins partia vinavant dal fatg ch'il stop d'entrar en il pajais saja legal.
En in'emprima decleraziun ha Spicer numnà la decisiun 'scandalusa'. En ina nova versiun da la decleraziun che saja vegnida publitgada curt suenter haja questa formulaziun dentant mancà.
Viandants cun in visum valaivel pon puspè entrar
Per las societads aviaticas munta quai che passagiers cun in visum valaivel per ils Stadis Unids pon puspè entrar en il pajais. Era sche questas persunas derivan dad in dals 7 pajais pertutgads. Las societads aviaticas han il pensum da sa cuntegnair tuttina sco avant il decret da Trump. Era la Swiss ha reagà immediatamain e lai puspè sgular tut ils passagiers cun documents valaivels en ils Stadis Unids. La societad da sgol saja en in dialog permanent cun las autoritads da duanas americanas.
In derschader da Bush
La decisiun è vegnida fatga da James Robart, in derschader ch'è vegnì elegì da George W. Bush, pia d'in republican. El saja da l'avis ch'i pudess dar donns irreparabels per abitants da dal Stadi sche quest scumond d'entrar stettia en vigur.
RR novitads 08:00
